Fandhakaaru

 ފެންނަ ނުފެންނަ މީހުން

=ފާޠިމަތު ފާހިރާ/ 12:ބީ= 

އަހަރަކީ 2013 ވަނަ އަހަރެވެ. ކޮންމެ ރަށެއްގައިވެސް ތިބި ލޯފަންމީހުންގެ އާބާދީ ހޯދުމަށް އެރަށެއްގެ ރަށު ކޯޓަށް އެންގުނެވެ. އެގޮތުން ގ.ޑާނކެންދޫގެ މެޖިސްޓުރޭޓު ކޯޓަށްވެސް އެރަށުގައި ތިބި ލޯފަންމީހުންގެ އާބާދީ ބެލުމަށް އެންގުނެވެ. މެޖިސްޓުރީ ކޯޓުގެ އިސްވެރިޔާ ޒައިން އަޙުމަދަކީ ވިސްނުންތޫނު ހަރުދަނާ ބޭފުޅެކެވެ. އެބޭފުޅާގެ ދަށުން މަސައްކަތްކުރައްވާ ކޮންމެ ބޭފުޅަކަށް ކަމޭހިތައެވެ. ނުރުހޭ ކަމެއް ދިމާވިނަމަވެސް ނަސޭޙަތްތެރި ވެލައްވަނީ އޯގާތެރިކަމާއެކުގައެވެ. އަބަދުވެސް ހިނިތުންވެލައްވާ ހިތްހެޔޮ ބޭފުޅެކެވެ. މިކަން އެރަށު ކޮންމެ ރައްޔިތަކުވެސް ދަނެއެވެ.
ރަށުގައި ތިއްބަވަނީ އެކި ފަންތީގެ ބޭފުޅުންނެވެ. ރަށް ތަރައްޤީވުމަށް ހުރި ބޮޑު ގޮންޖެހުމަކަށް ރަށުގެ އާބާދީ ވަނީ ވެފައެވެ. 312 މީހުން ދިރިއުޅެމުންދާ މިރަށުގައި ފުދޭވަރަކަށް ގިނައިން ލޯފަންމީހުންވެސް ތިބެއެވެ.

އާދައިގެ ދިރިއުޅުމެއް އުޅެމުންދާ އާދަޔާ ޚިލާފު މޮޅު ވިސްނުމެއް ގެންގުޅުއްވާ މުޙަންމަދު ވާޝިދަކީ ޑާނކެންދޫ މެޖިސްޓުރޭޓު ކޯޓުގެ މުއައްޒަފެކެވެ. ރަށުގެ ރައްޔިތުން ލޯބިވާ އެންމެންގެ ޔާރެކެވެ. ގާނޑެންދޫގެ ދޮންކަލޯއެވެ. ޒައިން އަހުމަދުގެ ދަށުން މަސައްކުރައްވާ މުރާލި ބޭފުޅެކެވެ. ކަމަށް ކަމޭހިށްތަވާ ބޭފުޅެކެވެ. ރަށުގައި ތިބި ލޯފަންމީހުންގެ އަދަދު ގެނައުމުގެ މަސައްކަތް ހަވާލުކުރެވުނީ ވާޝިދާއެވެ.

ރަށުގެ އުތުރުފަރާތު އަތިރިމައްޗަކީ ރަށު ރައްޔިތުންގެ ފިނި މައިޒާނެވެ. ހަވީރު ވެއްޖެނަމަ ރަށުގެ ގެތައް ފަޅުގޭތަކެކޭ އެއްފަދައެވެ. އަތިރިމަތި ފިޔަވައި އެހެން ދިމާލަކުން މީހެއްގެ ހިލަމެއްވެސް ނުވެއެވެ. ވާޝިދު އޭނާގެ މަސައްކަތާގެން އަވަސްވެގަތެވެ. ހަވާލުކުރެވޭ ކޮންމެ ކަމެއް ވީ އެންމެ އަވަހަކަށް ނިންމާލުމީ ވާޝިދު އާދައެވެ. ފޮތްގަނޑަކާއި، ގަލަމަކާއި، ބޮޑު ކޮތަޅެއް ހިފައިގެން ރަށުގެ އުތުރު ފަރާތު އަތިރި މައްޗަށް ދިޔައީ ހަވީރުގެ ވަގުތުކަމުންނެވެ. ފިނި އަށްޓަށް އަރާ ހަމަޖެހިލުމަށްފަހު ކޮތަޅުގެ ތެރެއިން އެއްޗެހި ތަކެއް ނެގިއެވެ. ގޮށް ނެތް ގަމީސްތަކަކާއި ގޮށް ތަކެކެވެ. އަދި އެގޮށްތައް ގަމީހުގައި ހަރުކުރާނެ ތިނޯހަކާ ބަރަންޏެކެވެ. އެއާއެކު ވާޝިދުގެ މަސައްކަތް ފެށިއެވެ. ތިނޯހަށް ރޮނދި ލައްވާ ފަރިތަކަމާއެކު ގަމީހުގައި ގޮށް ހަރުކުރަމުންދިޔައެވެ.

"ދޮންކަލޯ ކީއްކުރާ ދުވަހެއް؟" ރަށުގެ މުސްކުޅި ފުރައިގެ ފިރިހެނަކު ފިނިއަށިކައިރިން ދަމުން ވާޝިދު ކައިރީ އަހާލިއެވެ. ހަމައެއާއެކު ގަލަން ނަގާ ފޮތުގައި އެމީހާގެ ނަން ނޯޓުކުރިއެވެ. ފިނި އަށްޓަން އަންނަމުން ދިޔަ ގިނަ މީހުން ވާޝިދާ އެ ސުވާލު ދިޔައީ ކުރަމުންނެވެ. އެސުވާލުކުރާ ކޮންމެ މީހެއްގެ ނަންވެސް ދިޔައީ ނޯޓުކުރަމުންނެވެ. ގާތްރަޙުމަތްތެރިންނާއި އާއިލާމީހުނަށް ބެލުމެއް ނެތިއެވެ. އަވަށްޓެރިންނާއި ރަށުގެ ޢިއްޒަތްތެރިން ވެސް މެއެވެ.

ހަވީރު ފިންޏަށް ޒައިން އަހުމަދު ވެސް އޭނާގެ ކުޑަ އާއިލާއާގެން އަތިރި މައްޗަށް ދިޔައެވެ. ލޯބި ލޯބި ދެކުދިންނާއި އޭނާގެ ފިނިފެންމަލެއްފަދަ އަނބިކަބުލޭގެ އައިއެކުގައެވެ. ޒައިން ލޮލުގައި އެންމެ ފުރަތަމަވެސް އަޅައިގަތީ ފިނިއަށިމަތީ އިން ވާޝިދެވެ. ދެކުދިން އަނބިކަނބުލޭގެއާ ހަވާލުކުރުމަށްފަހު ވާޝިދު ކައިރިއަށް ދިޔައީ އޭނާ ކުރަމުންދިޔަ ކަމެއް ބަލާލުމަށެވެ. "އަނހަ! ވާޝިދު ކީއްތިކޮށްލަނީ؟" ހިތްހެޔޮކަމާއެކު ޒައިން އަހާލިއެވެ. "ޒައިން އަހުމަދު ނޯޓެޑް" ގަލަން ނަގާ ލިޔެލަމުން ވާޝިދު މަޑުމަޑުން ބުނެލިއެވެ. އެނެއްކާވެސް ފޮތާއި، ގަލަން ބާއްވާ ގަމީހުގެ މަސައްކަތާގެން ކުރިއަށް ދިޔައެވެ. "ކޮބާ ވާޝިދާ ހަވާލުކުރެވުނު މަސައްކަތް ނިމެންވެއްޖެތަ މީހާރު؟ މާލެ ހައި ކޯޓަށް ލޯފަންމީހުންގެ ލިސްޓު ފޮނުވާލަން އެބަޖެހޭ ހުކުރު ދުވަހުގެ ކުރިން، މިޔަދު މީ ބުދަދުވަހެއްނު" ފިނިއަށީގައި އިށީންނަމުން ޒައިން ބުނެލިއެވެ. "އެކަމާ ހާސްނުވޭ! މާދަމާ ހެނދުނު ކޯޓަށް ދަމުން ލިސްޓު ގެންގޮސްދޭނަން" ވަރަށް ޔަޤީންކަމާއެކު ވާޝިދު ޖަވާބުދިނެވެ. "ވަރަށް ރަނގަޅު! ވަރަށް ރަނގަޅު!" އިންތަނުން ތެދުވެ ހިނގާގަންނަމުން ވާޝިދަށް ތަޢުރީފުކުރުމުގެ ގޮތުން ޒައިން ބުނެލިއެވެ.

އިރުއޮއްސެން ކައިރިވި ވަރަކަށް އަތިރިމަތިން މީހުން މަދުވަމުންދިޔައެވެ. ފިނި އަށިތަކުން މީހުން ހުސްވަމުންދިޔައެވެ. ކުޑަކުދިންނާއި އެކުދިންގެ މައިންބަފައިންނެވެ. ޒުވާނުންނާއި މުސްކުޅި ފުރާގެ މީހުންނެވެ. މަޣުރިބު ނަމާދަށް ގޮވިއިރު ފިނި އަށީގައި އިން ހަމައެކަނި މީހަކީ ވާޝިދެވެ. އަވަސް އަވަހަށް ތެދުވެ ބޮޑު ކޮތަޅު ތެރެއަށް އެއްޗެހިތައް އެޅިއެވެ. ފޮތްގަނޑާއި ގަލަންވެސް ކޮތަޅު ތެރެއަށް ލިޔެވެ. ހަލުވިކަމާއެކު ގެއަށް ދިޔުމަށް ހިނގާގަތެވެ. ބޮޑު ކޮތަޅު ގޭތެރެއަށްލުމަށްފަހު ނަމާދަށް ދިޔުމަށް އަވަސްވެގަތެވެ.

އަނެއްދުވަހު ހެނދުނު ވާޝިދު ކޯޓަށް ދިޔައީ ވަރަށް ހިތްހަމަޖެހިލައިގެންނެވެ. އޭނައަށް ހަވަލުކުރެވުނު މަސައްކަތް ވަގުތުގެ ކުރިން ނިންމާލެވުނީތީއެވެ. ދިޔަގޮތަށް ގޮސް ޒައިންއާ ލޯފަންމީހުންގެ ލިސްޓު ހަވާލުކުރިއެވެ. "134 މީހުން މިހާ ބައިވަރު ލޯފަންމީހުން އުޅޭތަ މިރަށުގައި؟ ނުވާނެ އެހެންނެއް!" ލިސްޓުގައި 134 މީހުން ވާތަން ފެނި ހައިރާންވެފައި ޒައިން އަހާލިއެވެ. "ލައްބަ އުޅުއްވާ، އަޅުގަނޑަށްވެސް އެނގިލެއްވީ އިއްޔެ އެކަން" ވާޝިދު ޖަވާބު ދިނެވެ. " އަބްދު ﷲ ހުސެއިން، ނާކިން މުޙަންމަދު، ފާތިމަތު ނައުރީން، ހަސަން ހާމިދު، ޝިޒުރާ އަބޫބަކުރު" ނަމަކަށްފަހު ނަމެއް ޒައިން ކިޔަމުންގެންދިޔައަވެ. ".....ސާޒާ ރަޝީދު، މުޙަންމަދު މުސްޠަފާ، އަލީ ޝިފާއު، ނިޔާޒު ލުޠުފީ، ޒައިން އަޙުމަދު" ލިސްޓުގެ ފަހު ނަމަކަށް ޒައިންގެ ނަން އޮތުމުން ހައިރާންކަން ދެގުނަ އިތުރުވެގެން ދިޔައެވެ. "މީގަ މިހުރީ މުޅިންވެސް ލޮލަށް ފެންނަ މީހުންގެ ނަންތެކެއްނު. ވާޝިދުގެ ބައްޕަ ހަމީދުބޭގެ ނަންވެސް އެބައޮތް. ރަށު ކައުންސިލަރ ނިޔާޒު ލުޠުފީގެ ނަންވެސް. އެންމެ ކުޑަމިނުން އައިސް މަގޭ ނަންވެސް އެބައޮތް. ވާޝިދު އެނެއްކަ ނުބައި ލިސްޓެއް ހިފައިގެން އައިސްތަ ތިއުޅެނީ؟" ޒައިން ޝައްކުގެ ރާގަކަށް އެހިއެވެ. "ނޫން ހަމަ ތީ ރަނގަޅު ލިސްޓު" ހަރަދަނާކަމާއެކު ވާޝިދު ބުންޏެވެ. "ތިއެންމެންނަކީވެސް ފެންނަ ނުފެންނަ މީހުން. ބުނާނަމަ ލޯފަންމީހުން. އަޅުގަނޑު ގަމީހުގައި ގޮށްލާން އިންކަން ނޭނގޭމީހުން. ތިއިން ކޮންމެ މީހަކުވެސް އައިސް އެހީ އަޅުގަނޑު ކައިރީ ކީއްތޯ ތިކުރަނި.. ޒައިންވެސް އެހީމުތާ. ލޮލަށް ފެންނަނަމަ އަޅުގަނޑު ކުރަމުންދިޔަ ކަމެއް ނޭހިޔަސް އިނގެން ޖެހޭނު." ވާޝިދު ވީގޮތް އޮޅުންފިލުވާދިނެވެ.  

ނުހެން ހުރިނަމަވެސް ވީގޮތް އޮޅުންފިލުމުން ޒައިން ގާތަށްވެސް ހިނިއައެވެ. ކޮންމެގޮތެއް ވިއަސް ވާޝިދު އެބުނީ ތެދެކެވެ. ލޮލަށް ފެންނަ މީހަކަށް އޭނާ ކުރަމުން ދިޔަ ކަމެއް އިނގޭނެއެވެ. ކުރާކަމެއް އެނގުނަސް ކީއްކުރަނީތޯ އަހާލުން، އެއީ އިންސާނާގެ ޠަބީއަތެވެ. އެހެންވެ ޒައިން އަށްވެސް އެހުނީއެވެ. ރަށުގެ ގެތަކަށް ލޯފަންމީހުންގެ އަދަދު ބެލުމަށް މިފަހަރު ވާޝިދާއެކު ޚުދު ޒައިން ވެސް ދިޔައެވެ. ވާޝިދުގެ ޚިޔާލު ތަނަވަސް ސިކުނޑިން ދެން ކޮށްފާނެ މޮޔަ ކަމަކަށް ފަރުވާތެރިވުމުގެ ގޮތުންނެވެ.